Ensegner le galo
Le Galo,de cai q'c'ét ?
Le galo de cai qe c’ét ?
Le galo, parlement de Haote-Bertègn.
Le galo ét yeun dés deûz parlements « d’istouère » de Bertègn cotë le berton. I n’a pouint ren d’eun pâtouéz, d’eun sourparlement pas pus. Le galo ét eun parlement roman orinë du latin ao peupl parai côme le françaez, l’ocitan, l’espègnol, l’italien,…
Le galo ét le parlement q’ét prechë su 4 dés 5 departements bertons : la Laire-de-Bertègn, la maitië dés Côtes-d’A-haot, le tiere du Morbihan e l’Ile-e-Vilaine en tout.
Biao qe le galo seje eun parlement qi fut pus fot pâssë de goule a orai de reng d’aije a reng d’aije, il s’ecrit dedpés le 12e siecl. Lés daraines dizènes d’anées, j’ons pus vaer pas-meins le nombr d’ecrivaijes en galo cretr nete.
Le galo rest terjous eun parlement vioche caozë den le tous-lés-jous par 5% a 10% du monde qi demeurent en Haote-Bertègn e il ét interluzë par maitië pus de monde. Més le monde qi caozent galo sont a vieûzi e le parlement-la ét ranjë par l’UNESCO en-méle lés parlements en danjer pour de vrai.
C’ét qhe caoze q’il ét chomant astoure de pâsser le parlement-la assourfin qe de le garder.
L'ensegnement du galo
Dedpés 2004 qe le galo ét erqenu par la Rejion côme parlement d’ofice de Bertègn cotë le Berton. Le Rejion ebluce eune politiqe langaijiere devocionée de l’amain-la. (Assent Etat-Rejion)
Le galo ét erqenu par l’Eblucerie Nacionale q’acouraije a l’aprindr. (Lian a vaer le Billet Oficia)
L’ensegnement du galo ét apouyë par le Rectorat de l’academie de Rene q’a bani y-ètr « en devocion de prindr part a garder lés parlements rejionaos e a la rayée qhulturale de la Bertègn ». I perpoze dedpès 2021 dés formézons de 8 semènes de temp pour l-s ensegnou·ere·s assourfin q’i seraent den le câs d’ensegner le galo (en etrârie o l’Institut du galo). I levit etout eun post d’animou en galo pour parlever l’aprenrie-la.
*Rezè Admézë : rolée d-s ecoles qe le galo i ét ensegnë
Le galo d'o Cllâssiérs
Cllâssiérs ét eune consorterie d’ensegnou·ere·s d-s ecoles, apouyée par la Rejion e lés départements. Al a devocion de parlever l’ensegnement du galo den l-s ecoles permieres e den le segond degrë etout, den l’idée de perpozer eune chemine de rézon és ebluçons de la PS diq’ao licë.
A mener tout le cai-la, Cllâssiérs perpoze eune chemine entière « 15mn de gallo par jour » pour châqe cicl, dés maletées de cai su ben dés sujits e berchôze d’afutiaos d’otout.
« 15 mn de gallo par jour » ét eun ensegnement d’agegnement qe l-s ensegnou·ere·s peuvent i mener eune boutée o tous l-s oudieûs a lous amain sur ben dés sujits. Châqe semène son sujit, châqe sujit sa chanson. La chemine s’acote su la minze en mouvée de l’ebluçon, sa compernouere e su la chanterie. Le galo par le galo.
Eune amarouere pedagojiqe e eun terlatou aïdent és ensegnou·ere·s a s’en chevi d’o la chemine, amarer dés boutées e concrayer d-s afutiaos. L’amarouere entame etout dés boutées en cllâsse assourfin qe de montrer côment ensegner le parlement.
Lés chemines, la Gâzette de ghiments e d-s afutiaos sont a aqenétr su nôtr empllâ. Cllâssiérs empllaye la meniere d’ecri ABCD pour tous s-s afutiaos.
afutiaos pedagojiqes
Des manuels par cycle et des fiches à imprimer
Cllâssiers vous done la main
Cllâssiers accompagnent les enseignants qui mènent des séances de gallo
projits o le paiz
Des projets avec la population, des projets avec les medias, des rencontres entre écoles
